icon

তর্ মর্ বানাহ্ দ্বিজনর্ (চাকমা কবিতা)

Jumjournal

Last updated Dec 14th, 2019 icon 757

তর্ মর্ বানাহ্ দ্বিজনর্

আলোময় চাকমা

 

এক্ টেপ্ এক্ টেপ্ গুরি তেবে তেবে ;
তল্লেই ভিলি তেবেলুঙ্ বেবে।
মর্ নেইয়া, নোনিয়া হোচপানা!
সাতরঙ্ স্ববন্! আ—-
হিরিমিরি নাগর্ লুচ্চোমি।
আক্ গুরি থোইয়ঙ্ ভুদিবানি।
ইচ্চা তরে আওজ্ গুরি,
ত’ বুগিত্ চাবি চাবি,
উভোদ্ গুরি দিলুঙ্ মাবি।

সে তর্, ভালক্ বজর্ আগে ;
রাঙাঁবী দাগি ঘরত্ তুই-মুই,
বিজু খেবার্ লক্কে।
তর্-মর্ দ্বি জনর্,
সুঘো-দুগো হধা সয় সাগর্।
হুলি হুয়েই দিন্ ভর্।
এনে তর্ মনত্ আগেনী?
ফেলে ফেলে চোগোত্ ভাজেনী?

হদক্ উল্ পুরি যিয়োন্ শান্নি পিদে।
এ জাগাত্তুন্ ও জাগাত্ তদে তদে।
বাচ্ছেয়স্ দিনে-রেদে।
লোলোক্যা পরানে,
বুজ্ ন’ মানে।
ন’ বুজিলে পরান্,
বুজানাও হেনে।

অদ্ মদ্ ফুরেই, হোনোদিন্ এলে ;
নাগর্ নাগর্ আঁঝি দিনে হধে,
রাঙাঁ দা এদক্ দিন্ হুদু হুদু রলে?
এনে, তর্ এব’ মনত্ আগেনী?
সে সুঘোর্ দিনুন্ এব’ তর্,
চোগোত্ ভাজেনী?

মনত্ তুলি চেস্,
ঘুর্ বারিজা লামিলে,
দেবায় দর্ ধুরিলে,
মুগুলী জেদেনা ফুদেনেই,
হাঙ্ ন’ হাঙ্ গুরি চাবেনেই,
চানাহ্ ভুরোত্ বুজিনেই,
আহধ’ হুলুঙোত্ সাজিপানি লোই,
খারা অই অই —
হিজেনী হুন্দি যেন্ রিনি চেই,
ধাগাধাক্যা বুজিনেই,
ন’ ফুরেইয়া নাগর্ ভাচ্ মাদিনেই,
হদক্ সুঘোর্ দিন্ গুঙিয়েই।

একবার্ বো পিঙ্গমা ছড়াত্,
হাঙাঁড়া ধুরিবার্ ছলাত্।
আগুন্ লুড়ো মুরিনেই,
পধ্-ঘাদ্ আহরেনেই,
আহধে আহধ্ ধুরিনেই,
শিল্ চাদারা বে লামিনেই,
ফিরি এলংগোই জুন্ পহরত্।
তুই গেলেগোই ত’ ঘরত্।
মুই এলুংগোই ম’ ঘরত্।
এ হধানী হি তর্ নেই মনত্?
এক্কান্ ছড়াও বাদ্ নেই,
মাছ্-হাঙাঁড়া তোগে ন’ খেই।
হদক্ সুঘোর্ দিন্ গুঙিয়েই।

হাদিমাস্যা জুন্ পহরত্।
তুই মুই ইজোরত্।
পিবির পিবির বুইয়ারত্।
শিঙাঁ বে বে —
উভোগীত্ গে গে —
রঙে ধঙে হাদেয়েই,
মরে তুই এনে হবেনী?
সে সুঘোর্ দিনুন্ তর্ এব’
চোগোত্ ভাজেনী?

লাঙেল’ দাপ্ পাদেরী পহধদী আহধিদে।
শুনঙ্ ন’ শুনঙ্ হুই হারিনে মরে ডাগিদে।
নয় ভাদিগাছ্, নয় বড়াগুলো গাজত্ তলে,
গাজ’ শিঙোরোত্ বোই বোই,
চুচ্যাঙ্ তাগল্লোই খারা অই অই।
বাচ্ছেদে। বাচ্ছবার্ অলে।

জুমো ধানর্ পাদা এলুনী হেলুনী,
নাজিযার্ বুইয়ারত্।
তর্-মর্ নাগরর্ ভাচছানি,
বাঁঝি র’, হেংগ্রঙঅ র’ আ—-
চলাচলি হিরিমিরি লুচ্চোমি।
গঙি যিয়ে জুম্ পাড়ত্।
ভাজী উধে মর্ মনত্।
রেদোত্ দেগঙ্ স্ববনত্।

মর্ দ’ এজ’ মনত্ আগে ;
তুই জুমোত্তুন্ এবার্ ছলাত্ ;
ছেহবো, তর্ পুল্যাঙ’ তলাত্।
রিনি চেলে ঘোর্ ঘোর্। (ভারী)
আঝি আঝি পুজোর্ লুইয়ঙ্,
জুম্মবী আ হি আনর্?

হধা থোক্ ন’ থোক্ ;
মাদাহ্ মাদি আঝাঁ আঝিঁ।
সে দিনুন্ হি যিয়োননোই আজি? (হারিয়ে)
ভেরাক্ ভেরাক্ চোগোত্ ভাজে।
চেলে দেগিম্ পারা আহদে হাজে।
সে সুঘো দিনুন্ তর্-মর্।
বানাহ্ দ্বিজনর্ বানাহ্ দ্বিজনর্।।।
১৪/০১/২০১৫

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - jumjournal@gmail.com এই ঠিকানায়।

আরও কিছু লেখা

Jumjournal

Administrator

Follow Jumjournal

Leave a Reply