icon

ধুন্দুক (চাকমা গল্প)

Biken chege

Last updated Apr 12th, 2020 icon 308

ধুন্দুক -বিকেন চেগে

ধন্দুক

বিকেন চেগে

তারেঙে এচ্যা এব্রে সুধুমু গোরি আঘে। মুওত পহ্’ন আহ্’ঝি নেই, দ্বিভে চোঘোত পহ্’র নেই। এচ্যা তার কি উয়্যে! আগ’সান তেহ্ এচ্যা ন’ আহ্’ঝের, কধা ন’ কর খুঝিধোরি। আগেন্দি তেহ্ যারে দে-দ’সাত খুঝিধোরি মাদায়, ফাজিল গোরি গোরি আহ্’ঝায়। খালিক এচ্যা তা দুক্কান ধাবেবার কেয়োই নেই, যেহ্ একসলা এল’ বেঘর মন দুঘ ধাবে দিয়ে। বেঘর দুঘত কায় থেগেয়্যে, অদিনোত বলদিয়ে, চোঘো পানি পুঝি দিয়ে, মন’ দুঘ ধাবে দিয়ে। খালিক তেহ্ এচ্যা গাই কেয়োই নেই তা কায়। কেয়োই নেই তা মন’ দুক্কান বুঝিবার, কেয়োই নেই তা মন’ দুক্কান কমেবার। এচ্যা তা কায় কেয়োই নেই। খালিক তেহ্ যে-এ সিয়ানত্তে দুঘি নই, তেহ্ দুঘি অহ্’লদে তা সবনান, আঝায়ান ভাঙি কত্তা কত্তা উয়ে ভিলিনে। এচ্যা তা কধানী কেয়ো বুঝি ন’ পাল্যেও ঠিগই একজনে বুঝি পাচ্ছে। খালিক তেহ্ কন’ মানুচ নই, কন’ য়েমানও নই, কন’ সমাচ্যে-সমারীও নই। তেহ্ অহ্’লদে এ দেঝর প্রকৃতি। এ দেঝর সিজি প্রকৃতির সিজি বোয়েরান। বোয়েরান ঠিগই তারেহ্ সান্তনা দের। তারে সুচ্ছুরে দের, কন’ এক্কা তেহ্ আহ্’ঝেনি, কধা কয়নি। খালিক তারেঙে গভীন চিদেত দুবি আঘে। সেনত্তে প্রকৃতির মাদানা, মেয়্যায়ান ঠার গরি ন’ পারের।

সে মিধে আহ্’ঝি জুনোসান পতপত্যে পহ্’ন এল’। কধানী তার কোগিলর মিধে র’সান এল’। তেহ্ আহ্’ঝিলে পিত্থিমীর বেক্কানি দরে পোল্লে থেধ’। যক্কে মিধে বোয়েরর সমারে তা চুলানি উরিদ’ সেক্কে সর্গ রাজার ঝিবোও মু লোগে লোগে তারে চেই যেদ’। খালিক জুনানি সিয়ানি কিচ্ছুই ঠার ন’ পেধ’। তেহ্ নিজরে এক্কাও দোল ন’ ভাবিদ’ আ মানঝে দোল কলেহ্ কধ’- তুমি কি সিক্কেন কিজেনি এ বান্দর মুওসান মুয়ানরে দোল কহ্! মানঝে তা দোলানীরে বায়েনী গল্লেও তেহ্ বায়েনি ন’ গত্ত। তারেঙর চোঘোত জুনানিসান আয়োজর পরানবুধু ন’ এলাক। তারেঙে জুনানিসান কাররে কোচ ন’ পেধ’, গমও ন’ পেধ’ খালিক চিগোন-দাঙর বেগ’লোই আলুল দুলুল গোরি থেধ’। বেঘরলোই খারখোচ্ছে গোরি কধা কধ’। বেঘে তারে কোচ পেধাক।

আহ্! এচ্যা যুনি জুনানি থেধ’ সালেন য়েক্কন আহ্’ঝি আহ্’ঝি সাদেলুন। তা করত ম’ মাধাবো থোইনে কিরবে গোরিলুন। ইয়েনি ঈধোত তুলি তারেঙে ব’ নিঝেচ ফেলায় আ’ কক্কে চোঘো পানি মুয়োদি বেঁঈ ঠেঙত পরে ঠার ন’ পাই।

এচ্যা তেহ্ নিজরে গাই গাই পায়। সে ফেলে এচ্ছে দিনুনত আর’ ফিরি যেবার তা মনান ফুরফুরায়। খালিক মনে কলেও বিদি যিয়ে দিনুন ফিরে ন’ পারে আ ফিরিও যে- ন’ পারে। খালিক সে দিনর নিজেনি তারেহ্ মেলোমাচ বানায়। আদেক্যা গোরি ন’ চিন্যা ধোজ্জেত দুবি যায় আ ভাঝাদি উধে। তারেঙে ভাবে এগজা সেদিনর দিজনর কধা, দিজনর কোচপানার নিজেনি, পল্যে দেঘাদেঘির দৃশ্য আ দিজনে কাদানার নিজেনি। তারেঙে ভাবে আ চোঘোপানি ঝরায়। এচ্যা কি কেয়োই নেই তা চোঘো পানিনি পুজিবার, তা মন’ দুক্কান ধাবে দিবের?

সে দিনুন দিজনে একসমারে কেলাজ গোচ্ছোন, পড়া ন’ পারলে শিঘে দে-দি গচ্ছোন। সমারে কিয়ঙত যেই ভগবান বুদ্ধর বাত্তির আহ্’ঙেউন। আঙ’চ্যা পুন্নিমাত অষ্টশীল পালেউন। কিয়ঙ’র ভান্তের মুয়োত্তুন ধর্ম কধা শুন্নোন। আহ্! এচ্যা আর্ কায় কেয়ো নেই। বেক্কানি নিজেনি ওই যিয়েগোই। কলেজ বন্ অহ্’লে যক্কে যা ঘরত তে যেদাক সেক্কে কধক চেরবো চোঘোত্তুন চেরাং চেরাং কোচপানার চোঘোপানি ঝরি পরিদো। দিজনে চোঘো পানিনি মুঝি দিয়েদি গোরিদাক। ইয়েনি ভাবি তারেঙে আর’ বেচ কাঁনে, তা পরান ভিদিরেত্তুন খোজোরে খোজেরে উধে। এচ্যা যুনি জুনানি থেধ’ সালেন তা সমারে কিয়ঙত যেদ’। আ নোনেয়ে গরি কধ’, তারেঙ দা মরে তারেঙত্তুন ফেলে ন’ দিচ, তারেঙত্তুন পল্লে মুই ন’ বাজিম। তারেঙে মিধে আহ্’ঝিদি কধ’ কেত্তে ফেলে দিধুং? যারে পরানত জাগা দোং, যেহ্ গোদা পরান ঘরপাদা জুরি লোয়ে।

তারেঙে জুনানিরে নিনে কধক ভাবে। য্যান উক্কো পৈনাঙি বিজ্ঞানী। তারে দেঘি মনে অহ্’য় বিজ্ঞানী নিউটন। তেহ্ ভাবের আ ভাবের। তারে ন’ দেঘিলে কারর পোত্য ন’ অভ’ । তারেঙে বার বার পুরন দিনর সুগর দিনত আহ্’ঝি যায়। তেহ্ তা জুনানীরে ফিরে আনিবাত্যেই। খালিক এক্কান জ্যেকজ্যেক কধা আঘে “যে যায় তেহ্ আর্ ফিরি ন’ এঝে। যেধক আনিবার, ফিরেবার চে-ধ’ সাত ফিরে ন’ পারে। ” এচ্যা জুনানীরও সেধক্যা উয়্যে। তেহ্ আহ্’ঝি যিয়েগোই রেদর ঘুপঘুপ্যা আন্ধারত। তেহ্ দুবি যিয়েগোই অকুল ধোজ্জের গভীন পানি মুরোত। খালিক এভ’ তারেঙে তা চিদো বুধুত সুমুরি থোইনে তা কধানী তাহ্ নিজেনিত লারচার গরে আ কাঁনে। তারেঙে চিতদীঘোল গোরি ভাবে………….

ও তারেঙ দা! কেঝান আঘচ? এ কধানী মিধে আল্যাঙ গোরি কধ’। তারেঙে আহ্’ঝি আহ্’ঝি কধ’ ত’ কোচপানায় গম আঘঙ। তুই..? এ কধান শুনি জুনানি মু চেবে চেবে আহ্’ঝিদ’। সক্কে তা এ আহ্’ঝিবো প্রকৃতির বেক্কানিরে ঝঁত গোরি ঊধেই দিধ’। এ ঊধানার দরে প্রকৃতি ঝুপ ওই চুপ গোরি থেধ’। তেহ্ ও কধ’, মুই দ’ ত’ কোচপানায়, মেয়্যা কিরব্যাই গম আঘঙ..।

দি মাঝ আগেন্দি আদেক্যা জুনানি গাড়ি এক্সিডেন্ড অহ্’য়। তেহ্ মাধাবোত বেচ আঘাত পিয়ে । যাত্তে তেহ্ জীংহানির উজোনির পধত্তুন লামোনি যে পিয়েগোই। তা লাঙ্যা তারেঙে আ বেগরে ফেলে। এচ্যা তারে কেয়োই ঈধোত নাহি কোই পারা ন’ যায়। খালিক তারেঙে এঝ’ তা কধানী নিমোন গোরি ভাবে আ কাঁনে । কধক তেঙা ধালিলাক তুয়ো বাজে ন’ পারন আ যুনিও জুনানি বাজি থেধ’ সালেন পিত্থিমীত কিচ্ছু ন’ অহ্’লুন বানা উক্কো দুঘোর ভুধিসারা। কেত্তেভিলি দোলে ভাত খেই ন’ পারলুন, দোলে কধা কোই ন’ পারলুন, ঘুম যেই ন পারলুন গমেদালে। তারেঙে কধক বাত্তি আহ্’ঙেয়্যে। কধক শীল পালেয়্যে খালিক কি অব’অায়। কার কক্কে মরন কন্না কোই পারে! এক্কান কধা আঘে “যেবর মাঘে সে বর পাই, গোজেনে বর দিলে ন’ ফুরায়…। ” ইয়েন চাঙমা সাধক কবি শিবচরনর গোজেনো লামাত আঘে। খালিক বুদ্ধ কোয়ে কর্ময়ানই মানঝোর দাঙর উক্কো সমাচ্যে, “যে কাম গরে সে কাম’ ফল অক্ত এলে ভোগা পরে।” অহ্’লে জুনানিরও সে দঝা উয়্যে। খালিক তারেঙর শীল পালানা, বাত্তি আহ্’ঙানা ভঝমান সাত্থক ন’ অহ্’লেও কি অভ’, জুনানি তা করত পুরি তারে ন’ ফিচ্ছে দেঝত ফেলে যিয়্যেগোই। আ জুনানি কোই যিয়্যে, ও তারেঙ দা যুনি ভুল গোরি থাঙ খেমা গোরিচ। তারেঙে কধক রেত জাগি কাঁন্যে। দোলে ভাত ন’ খায়। দোলে লেঘা ন’ শিঘে । এধক্যা গরি ইয়ানি নিজর ন’ অহ্’লে কন’জনে কোই পাত্তাক নই যেহ্ মনানে কেঝান গোরি উধে। এচ্যা তারেঙে গাই গাই তা কায় কেয়ো নেই। বানা চেরবো চোঘোর চেরাং চেরাং পানি আ একবুক ভাঙা সবন, আঝা ভাঙা অকুলো ধোজ্জের পিরিসারা! প্রকৃতি এধক চেল’ বোঝেবার, তা মনান দর’ গোরিবার, দুক্কান ধাবেবার খালিকক ন’ পাল্ল। ভালক্কন পর তারেঙ’ মুয়োত্তুন কয়েক্কানি কধা নিগিলি এল’-
ও ম’ জুনানি, কুধু আঘজ,
ফেলে মরে?
ঐ দেবাবোর জুনানে দ’
ত’ সান্যান ন’ জ্বলে!
ত’ সান্যান ন’ আহ্’ঝে।
তুই নেই তারাউনও কম জ্বলন,
তুই নেই কিচ্ছু নেই।
এচ্যা তুই থেদে ম’ কায়।
আহ্’ঝি আহ্’ঝি থেধুং ত’ কায়।
ও ম’ জুনানি, আয়
ফিরি আয়, ফিরি আয়, আয়…

এ কধানি কোই তারেঙে কক্কে মাদিত গোচ্ছে পোরিল’ কেয়ো কোই ন’ পারলাক।

( ফগদাং-“ফুদন্দি ফুল’ তুম্বাজ ” নাঙে সাহিত্য পত্রিকার ১ম সংখ্যা, ১ম বঝর, ২১ ফেব্রুয়ারী-২০১৬
)

জুমজার্নালে প্রকাশিত লেখাসমূহে তথ্যমূলক ভুল-ভ্রান্তি থেকে যেতে পারে অথবা যেকোন লেখার সাথে আপনার ভিন্নমত থাকতে পারে। আপনার মতামত এবং সঠিক তথ্য দিয়ে আপনিও লিখুন অথবা লেখা পাঠান। লেখা পাঠাতে কিংবা যেকোন ধরনের প্রয়োজনে যোগাযোগ করুন - jumjournal@gmail.com এই ঠিকানায়।

আরও কিছু লেখা

Biken chege

Author
যে ভাঝে মাআ, বাআ দাগি মাদন, যে ভাচ মরে সেঘেয়ওন সে ভাচ্ছান মর আয়োজর। সে ভাঝত্তে যুনি পরান যায়, যোক.... The language that parents speak. The language they have taught me is my favorite. If life goes for this language, it goes ...

Follow Biken chege

Leave a Reply